- living
- by mabel shek
- 2023-08-31
快到中秋節，難以抗拒款式千變萬化、滋味無窮的月餅。最近各個品牌紛紛推出了「估佢唔到」的創新口味月餅，令人滿心驚喜！編輯們搜羅了4款好睇又好食的月餅禮盒，當中有大閘蟹肉、蟹膏做出咸香口味、芒果粒粒配麻糬、香濃朱古力加奶黃，以及包裝設計最具心思的款式，大家一於提早揀選心水月餅迎接中秋節！
Joey@Chief Editor 推介：Lady M Moonglow中秋月餅禮盒
每年中秋節都會挑選好睇又好食的月餅送俾親友，今年心水係Lady M呢個圓拱型粉紅禮盒。盒內有三款口味共6個迷你月餅︰班蘭抹茶奶皇、荔枝玫瑰奶皇、柚子牛奶奶皇月餅，大部分人都鍾意。最有驚喜係禮盒可以當成首飾箱，擺放戒指、頸鍊等，都幾實用！
Sue@Senior Editor 推介：神燈金蟹皇麻糬月餅
踏入初秋，筆者的辦公桌已經被月餅包圍，當中一款「神燈金蟹皇麻糬月餅」相當有新意，值得介紹給大家一試。每年秋天都是大閘蟹季節，沒想到蟹肉與蟹皇以製成月餅，味道更是出奇地匹配。蟹仔造型打卡一流，由大量鮮味蟹肉混合香濃蟹膏以及蟹皇醬，更加入彈牙的麻糬做內餡，雖然分量偏少，勝在新意與造型搭夠，以它與一班朋友開心過節絕對不會失望。
Jason@shefluencer 推介：鋒味月餅禮盒
月餅種類五花八門，大家對傳統口味都「吃膩了」，而數到每年最令我期待的便是鋒味月餅。今年除了陳皮豆沙月餅外，經典的火腿月餅亦換上西班牙標誌性的Serrano Ham，煙燻咸香味更濃郁醇厚，盡享西班牙風情！而鍾意試新嘢的你，我極度推薦全新的「芒果麻糬月餅」，一咬滿滿芒果的顆粒感，配搭淡淡清香的椰絲，酸甜香氣更誘人，再加上糯米粉口感QQ彈彈，今個中秋讓人一口接一口吃不停！
Mabel@Content Manager 推介：半島酒店迷你朱古力奶黃月餅
我個人從來都不好月餅，怕傳統的甜膩，又怕奇特口味。今年半島酒店首次推出的迷你朱古力奶黃月餅，正合我心意。當中備有2款滋味口味：迷你朱古力軟心拖肥奶黃月餅和迷你朱古力布朗尼夏威夷果仁奶黃月餅，咬一口滲進濃濃的可可香，略帶奶黃的咸香；尤其喜愛後者，果仁餡料增添口感，而且甜度適中，啱晒朱古力控！
